بدیع الزمان حضرتلری ، ” رسالۀ نورڭ مهم بر وظيفه سي ده قرآن یازیسنی محافظه ایتمكدر “ دییه رك عمری بوینجه یازدیغی أثرلری قرآن حرفلریله تألیف ایتمشدی . طلبه لرینه ده بو أثرلری اللریله یازارق چوغالتمه لرينى امر ایتمش و بو شكلده قرآن يازيسنڭ قورونوب كليشديريلمه سني صاغلاميشدي . حتّی ” رسالۀ نور طلبه سينڭ اڭ اهمّیتلی وظيفه سي اونی یازمق و یازدیرمقدر و انتشارینه ( ياييلمه سنه ) یاردیم ایتمكدر . اونی یازان ویا یازدیران رسالۀ نور طلبه سی عنواننی آلیر “ دییه رك رساله لری قرآن یازیسیله یازوب چوغالتمه يي مهم بر طلبه لك شرطی اولارق كوسترییور ، ایكی حديث شريفه طایانارق قرآن و سنته خدمت ایدن رساله لری یازمه نڭ یوز شهید ثوابی قزانديراجغني بیلدیرییوردی .
خسرو افندی ، بدیع الزمان حضرتلرینڭ صاغلغنده اولدیغی كبی ، معنوی چوق كوزللكلری بارينديران یازی خدمتی نڭ اقسامەدن دوام ایتمه سی ایچون بویوك غيرتلر صرف ایتدی . چونكه حضرت استادڭ وفاتندن صوڭره ، رسالۀ نورڭ كیزلی دوشمانلری سیستملی بر شكلده یازی خدمتڭڭ علیهنده بولونمغه ، اونی نور مدرسه لرندن قالدیرمق ایچون دساسانه چالیشمغه باشلامشلردى . دوست صورتنده نور طلبه لری ایچنه صیزان بعض كيشيلر ، آناطولی یی قاریش قاریش كزییورلر ، ” قرآن یازیسیله خدمت وقتنڭ آرتیق كچدیگی ، لاتین آلفابه سيله خدمت ایتمه نڭ داها أونملی اولدیغی ، قرآن حرفلری ایله خدمت ایدنلرڭ حبسلردن قورتولاماياجغي “ كبی افساد ایدیجی و شوق قیریجی جمله لرله قفالری قاریشدیرییورلر ، انسانلری خط قرآن خدمتندن اوزاقلاشدیرمق ايستييورلردي . بر قسم انسانلر دە فرقنده اولمادن بو فتنه پلانلرينه آلت اولویور و بو سوزلری غافلانه نشر ايدييورلردي . حالبوكه رسالۀ نور دوشمانلرینڭ بو پلاننه قارشی بدیع الزمان حضرتلری شو چارپیجی جمله لرله طلبه لرینی چوق أوڭجه دن ایقاظ ایتمشدی :
” مع التأسف رسالۀ نورڭ ایمانسز و امانسز ( آجیمه سز ) جنّ و انس دوشمانلری ، اونڭ چلیك كبی متن قلعه لرينه و الماس قیلینچ كبی قوتلی حجّتلرينه مقابله ایده مدكلرندن ، چوق كیزلی دسيسه لر و خفی ( كیزلی ) واسطه لر ایله ؛ خبرلری اولمادن یازانلرڭ شوقلرینی قیرمق و فتور ویرمك و یازیدن واز گچیرمك جهتنده شیطانجه سنه هجوم ایدوب ضربه اورییورلر . “ [١]
بو شكلده ، استاد بدیع الزمان حضرتلرینڭ صاغلغنده بتون مملكته یرلشمش اولان خط قرآن خدمتندن انسانلری مع الاسف قوپارييورلردي . خسرو افندی ایسه ، خط قرآن علیهنده كی بو تخریباته قارشی بویوك بر جهاده كيريشدي و یازی خدمتنی یڭیدن جانلاندیرمق ایچون سیستملی بر چاليشمه باشلاتدي . قرآن يازيسنڭ محافظه سی ایچون طلبه لرینه دائما تلقينلرده بولونویور بو پك قیمتدار خدمتڭ نه قدر مهم و ثوابلی اولدیغی أوزرنده تحشیدات یاپییوردی . هركسڭ اسكی یازی یی قولایلقله اوگرنمه سی و قیصه زمانده رساله لری یازمغه باشلامسی ایچون یڭی متودلر كليشديرييوردى . خسرو أفندینڭ ، بو غایت شعورلی غیرتلری سایه سنده ، وطنڭ درت بر یاننده یڭی نور مدرسه لری آچیلییور و اونڭ طلبه لری ، حضرت استادڭ باشلاتديغي ، ” قرآن یازیسنی محافظه ایدرك رسالۀ نورله ایمانه خدمت ایتمك “ اساسنی ، اصليتنى بوزمادن دوام ايتديرييورلردي . بویله لكله اونلر ، نور طلبه لرينڭ ممتاز بر وصفلری اولارق بدیع الزمان حضرتلرینڭ ذكر ایتدیگی ، ” بتون قوتلریله خطّ قرآني محافظه ایتمگه “ اسكیدن اولدیغی كبی شیمدی ده دوام ایدییورلردی . رساله لری نشر ايده رك قرآنڭ معنا و حقیقتلرینه خدمت ایتدكلری كبی یازی و حرفلرینه ده خدمت ایدرك ” خدمت قرآنیه “ معناسنی تام آڭلاميله ياشايوب ياشاتمه يه غیرت ایدییورلردی .
بدیع الزمان حضرتلرینڭ نور طلبه سی اولمه نڭ بر شرطی اولارق كوستردیگی رسالۀ نوري قرآن یازیسی ایله یازارق نشر ايتمه خدمتی
خسرو افندی صحبتلرنده ، رساله لری یازمه نڭ هم قرآن یازیسنی محافظه ایتمك ، هم ده ایمان حقیقتلرینی نشر ایتمك معناسنی طاشيديغڭدن معنوی بر جهاد حكمنده اولدیغنی و بو زمانده یوز شهید ثوابی قزانديرابيله جگني ، رسالۀ نورده كچدیگی طرز أوزره آڭلاتييوردي . یینه بر صحبتنده یازینڭ قیمتی حقّنده شویله دیمشدی :
” رسالۀ نوري يازمق بویوك بر معنوی جهاددر . شهیدلك مرتبه سی قزاندیرر . [٢] بو دورده قورتولمق شهید ثوابی قزانمقله ممكندر . چونكه جناب حقّ شهيدلرڭ بتون كناهلرینی عفو ایدییور . قراڭلق بر كیجه ده ، قراڭلق بر اورمانڭ ایچریسنده بر كبریت باشی قدر ایشیق بر انسانه نه قدر لازمسه ، سزڭ صرف ایتدیگڭز مركبلر آخرتده او نسبتده سزه فائده ویره جك . “ [٣]
خسرو افندی ، قلمله یازارق رسالۀ نوره خدمت ایتمه یی نور طلبه لری ایچون بر كماله ايرمه وسيله سي اولارق كورمكده و ” رسالۀ نور یولنده انسانلر رساله لری اوقویوب یازمقله و یازدیرمقله كماله ارأرلر . اونڭ ایچون بر كیمسه رسالۀ نورڭ حقیقتنه ایرمك و كماله ایرمك ایسترسه اونی ، اوقویوب يازملي و يازديرملي “ دیمكده یدی . اوڭا كوره قرآن خطنی ( یازیسنی ) محافظه ایتمك ایچون هر كون مساعی صرف ایتمك ، قلبلرڭ آخرته دونمه سنه ده سبب اولویوردی . حتّا بر كون بر طلبه سنی ” قرداشم دقّت ایت ! اون بش كوندر یازی يازمييورسڭ ، قلبڭ دنیایه دونویور ! “ دییه ایقاظ ایتمشدی .
بدیع الزمان حضرتلرینڭ رسالۀ نور طلبه سی اولمه نڭ اڭ مهم شرطنڭ رسالۀ نوري يازمق و یازدیرمق اولدیغنی سویله مسی كبی خسرو افندی ده رسالۀ نور دائره سنده قالمه نڭ اڭ مهم شرطنڭ یازی یازمق ، قلمله خدمت ایتمك اولدیغنی طلبه لرینه دائما سويلردي . بر صحبتنده ، شهید ثوابنڭ قزاندیراجغی عظیم فائده لردن برینی طلبه لرینه شویله افاده ایتمشدی :
” هپڭز ، برر پارماغيڭزي ، صاغ اليڭزڭ باش پارماغيله شهادت پارماغی آراسنه آلوب صیقین ! نه قدر آجی حس ایتديڭز ؟ ایشته ، شهید ده أولوم آننده آنجق او قدر آجی حس ایدر . بو قزانچ آزميدر ؟ “ [٤]
استاد بدیع الزمان حضرتلری ، قرآن حقیقتلرینڭ معنوی بر تفسيري اولان رسالۀ نوري نشر ايتمه نڭ معنوی بویوك بر صَدَقه حكمنه كچدیگندن ، ” صَدَقه بلایی دف ایدر “ حديثنه كوره پك چوق بلانڭ دفعنه وسیله اولدیغنی اثرلرنده مكرّرًا وورغولامشدى . خسرو افندی ده عین حقيقته اشارتله ، قلمله یازارق بو ایمان قرآن درسلرینی بالفعل نشر ايتمه نڭ پك چوق بلالرڭ دفینه وسیله اولاجغنه تماس ایدردی . بر دفعه سنده عین منوال أوزره طلبه لرندن بریله آرالرنده شویله بر قونوشمە جریان ایتدی :
” بو قرداشڭ كوینده هر سنه برقاچ كیشی وورولورمش ؛ بر چوجق قاوغه سندن ، بر كوپك قاوغه سندن آدم ئولدیریلن بر كويمش “ دییه طارف ایتدیگی بر طلبه ایله آرالرنده شو قونوشمه لر كچر :
” سن قاچ سنه دن بری یازی یازییورسڭ ؟ “
” بر سنه دن داها اوزون زماندر افندیم . “
” پكی ، او زماندن بری كويڭزده جنایت اولدیمی ؟ “
” اولمدی افندیم “
” اوندن أوّل “
” اوندن أوّل ، هر سنه أوچ بش كیشی أولديرولوردي افندیم . “
” باق قرداشم ، ساده جه سنڭ اوراده قلمله خدمتڭڭ باشقه لرینه دە بو قدر فائده سی اولویور . او كوتولكلره قالقان اولویور . كريسني سز قیاس ایدیڭز . “ [٥] ایچنده یاشادیغمز آخرزمانڭ دهشتی حقّنده كلن حديثلره كوره ” بو زمانده ایمانی محافظه ایتمك قور آتشي چیپلاق الله طوتمق كبی “ زوردي . بو تهلكه لی حالی صیق صیق طلبه لرینه خاطرلاتان خسرو افندی ، آخرزمانده قلمله خدمتڭ و قرآن خطنی محافظه ایتمه نڭ اهمیتنی شویله ایضاح ايتمكده يدي :
” بوگونكی كناهلره قارشیلق كله بیله جك هیچ بر عمل یوقدر . چونكه بو زمانده ایشله نن كناهلر هر عصرده كیندن چوق داها فضله در . ایمانی زده له يه جك و اورته دن قالدیراجق درجه یه كلمش . بو كناهلری قارشیلایاجق ثوابلر ، آنجق شهید ثوابی قزاندیران عمللرله دىر . آنجق رسالۀ نوري يازوب نشر ایتمكله قزانیلان شهید ثوابیله بو كناهلر قارشيلانابيلير . یوقسه دیگر عمللر بو عصرده كی كناهلره قارشیلق كلمییور . شهید ثوابی آلمدقدن صوڭره بو عصرده یقایی قورتارمق زور . چونكه ایشله مش اولدیغی كناهلره قارشی مقابله ایده جك ثوابی یوق . قلمله خدمت ایدرسه ڭز جناب حقّ شهید ثوابی احسان ایده جك . سزڭ صباحلین اويڭزدن چیقوب آقشام اويڭزه كیرنه قدر كوزيڭزدن و قولاغڭزدن كلن كناهلره قارشی شخصی عبادتڭزڭ ثوابی كافی كلمز . فقط اگر یازی يازارسه ڭز علم طلبه سی صنفنه داخل اولورسڭز و كلی بر عبادته مظهر اولورسڭز . یارین قیامت كوننده ان شأ اللّٰه قورتولور كيدرسڭز . “ [٦]
خسرو افندی ، رساله لری اوقویوب یازارق ایمان حقيقتلريله بالفعل مشغول اولمه نڭ معنوی كیرلردن آرينمه يه وسیله اولاجغنی بر صحبتنده ویردیگی شو مثالله افاده ایتمشدر :
” ناصلكه صنايعده چالیشان بر تعمیرجی چیراغی نه قدر ایسته مه سه ده مساعيسي مدتنده كيرلنمكدن قورتولاماز . آنجق آقشام اوه دونديگنده طولومنی چیقارتیر ، تمیزلك یاپار ، كیرلرندن آرينير . بونڭ كبی سز ده كناهلردن اوزاق قالاجغم دیسه ڭز ده قالامازسڭز . لكن آقشام اويڭزه كلديگڭزده آبدست آلوب قلمی الڭزه آلیر قرآن خطیله رسالۀ نورلري يازارسه ڭز عینًا او تعمیرجی چیراغی كبی كون بویی قزاندیغڭز معنوی كيرلريڭزدن آرينيرسڭز ، تر تمیز اولورسڭز . “ [٧]