اسلام تاریخی بوینجه شیخ عبد القادر گیلانی ( ق س ) حضرتلری كبی كرامتلریله مشهور اولمش نیجه اولیالر كلوب كچمشدر . عصرلر بوینجه اولیادن صدور ایدن او قدر چوق كراماته شاهد اولونمشدركه ، یوزلرجه تواتر درجه سنده قوت قازانمشدر . بوندن طولاییدركه كلام عالملری ” اولیانڭ كرامتی حقدر “ دییه رك بونی ایمانی مسئله لر آراسنه آلمشلردر . اولیانڭ كرامتنه بر نمونه اولارق ؛ حضرت عمرڭ ( ر ض ) منبر أوستنده ، بر آیلق مسافه ده بولونان ساریه نامنده كی بر قومانداننه ” یا ساریه ، طاغه چكیل طاغه “ دییوب ، كندیسنه ایشیتدیروب ظفرینه سبب اولمسی حادثه سی میلیونلرجه امثالندن یالڭزجه بریدر . بو نقطه ده بدیع الزمان حضرتلری ، ولایتڭ پيغمبرلگڭ بر دلیلی اولدیغنی سویلر و رسالتڭ تبلیغ ایتدیگی ایمان حقیقتلرینی ، اهل ولایتڭ قلب كوزیله كوروب روحیله ذوق ایدرك عین حقیقتی عین الیقین درجه سنده تصدیق ایتدكلرینی افاده ایدر .
ایشته بو نوعدن باشده بدیع الزمان حضرتلری اولمق أوزره خلوصي بگ ، حافظ علی و خواجه صبري كبی بعض بویوك نور طلبه لری دخی اللّٰهڭ بر اكرامی و یاپیلان ایمان خدمتندن راضی اولدیغنڭ بر علامتی اولارق بعض كرامتلره مظهر اولمشلردر . بالخاصّه استاد بدیع الزمان حضرتلرینڭ ، زیارتنه كلنلرڭ قلبلرندن كچن سؤاللری بیلوب داها اونلر صورمدن مناسب جوابلر ویرمسی یوزلرجه كز شاهد اولونمش اولان كرامتلرندن یالڭز بر نوعي ايدي .
بدیع الزمان حضرتلرینڭ كندیسندن صوڭره دعواسنی كسكین فراست و درایتنه امانت ایتدیگی خسرو افندی ده استادي گبي خدمت نوريه ده پك چوق خارقه لره و كرامتلره مظهر اولمشدر . هنوز رسالۀ نوري يازمه يه باشلادیغی ایلك صیره لرده ، بویوك بر خارقه اونڭ الیله ظهور ایتمش و - داها أوڭجه ده بحثی كچدیگی أوزره - بدیع الزمان حضرتلری طرفندن بو خارقه كرامت ، ” خسرو كبی … بر قرداشمز ، بر آیده اون درت كتابی كوزل و دقّتلی یازمه سی ، شبهه سز دردنجی بر كرامت اسرار قرآنيه در . “ [١] جمله لریله افاده ایدیلمشدی .
رسالۀ نورله ایمانه خدمت یولنده دنیادن ال اتك چكوب قرق ییللق بر انزوایی ترجیح ایدن و بو اوغورده هر تورلی چله يه كوگوس كرن و بدیع الزمان حضرتلرینڭ اڭ بویوك یاردیمجیسی و بایراقداری اولان و تام بر زهد و تقواي كامله ایله عمر سورن خسرو افندی ، استادي گبي بو عصرە ناصب اولمش اللّٰهڭ ولی قوللرندن بختیار بر ذات ایدی . بو جهتله حضرت استادڭ كندیسی حقّنده ، ” حقیقتًا او ، خدمت نوريه ده بر عنایته مظهردر . “ [٢] دیدیگی كبی خدمت نوريه سي بوینجه پك چوق ، عنایات و كراماته مظهر اولمشدر . بوندن أوّلكی قيصيملرده اونڭ أوزرنده تظاهر ایدن و رسالۀ نوره مال اولمش بعض خارقه لر ذكر ایدیلمشدی . بوراده ایسه ١٩٦٠ صوڭره سی دونمده خسرو أفندینڭ طلبه لری طرفندن شاهد اولونمش بعض كرامتلرینه اشارت ایده جگز .
امكلی باش چاووش اشرف أوز أرڭ خاطره سی
” ١٩٧١ ‘ ده مملكت چاپنده سكسان كسور مدرسه قاپاتیلوب نور طلبه لری حپسه آتيلديغنده مرعشده كي مدرسه طلبه لریله برلكده ، بو ظلمه سبب اولدیغنی دوشونديگمز دنیاجه مشهور بر ذاته نمازلرڭ آردندن اسمًا بد دعا ایتمگه باشلادق . او صیره مرعشدن بر قرداش ، خسرو استادمزي زیارته اسپارطه یه كیتمش . دوندیگی زمان بڭا : ” اشرف آغابگ ، استادمزڭ سڭا سلاملری وار . ‘ كیمسه یه اسمًا بد دعا ايتمه سينلر دیدي . فسبحان اللّٰه قرداشم نیه سویله دڭ بددعا ایتدیگمزی دیدم . واللّٰه بن سويله مدم . بویله یاپدیغڭزدن دە خبرم یوق “ دیدی .
یینه بن اگردیرڭ بر كوینده قره قول قوماندانلغی یاپاركن اوراده كی خلقڭ بربرینه افترالرندن اییجه بوڭالمشدم . زمان زمان جناب حقّه دعا ایدركن ، هر ایكی استادمزي دە شفاعتجی یاپارق اورادن قورتولمه يي نیاز ایدییوردم . الحمد للە صوڭنده جناب حقّ بزی اورادن قورتاردی و يالاواچڭ بر كوینه تعیین ایدیلدم . بن اوراده يكن أوڭجه كی كویڭ ایلری كلنلری كلدیلر . ” بز كركيرسه باش باقانه قدر چیقوب سنڭ تعييننى كويمزه كیری آلدیرمق ایسته یورز “ دیدیلر . دیدمكه ” قرداشم بن شیمدی سزه مثبت یا دە منفی بر جواب ویره مم . أوڭجه خواجه م خسرو افندی یله بر كوروشه يم . داها صوڭره سزه بر جواب ویررم “ دیدم . كلدم ، كوچك جكمه جه ده وقفڭ ياقيننده كي قالدیغی كوشكده كندیسنی زیارت ایتدم . بڭا ” شیمدی نره ده سڭ قرداشم ؟ “ دییه صوردی . ” افندیم بن او كویدن يالاواچده بر ناحيه نڭ قره قول قوماندانلغنه تعیین ایدیلدم ، شیمدی اوراده يم “ دیدم . ” بن سنڭ او كویدن قورتولمان ایچون چوق دعا ایتدم قرداشم ، چوق دعا ایتدم “ دیدی . دیمككه بزم اوراده كی صیقینتیلریمزدن جناب حقّ خبردار ایتمش و اونڭ دعاسی بركتیله اورادن قورتولمشز . بویله چوق خارقه حاللرینه شاهد اولوردق خسرو أفندینڭ .
خسرو افندی چوق نورانی چوق مبارك بر شخصدي . كیم كورورسه كورسون ، ” صانكه بو دنیا آدمنه بڭزه مییور “ دیردی . ملائكه كبی نورانی مبارك بر شخصدي . شفقتلی مرحمتليدي . حتّی شفقتنڭ بر كرامتلی نمونه سنی شویله كوردك . مرعشدن درت آرقداش كيتمشدك . ایچمزده كی كنچ بر آرقداش یول پاره سنی بورچ آلارق كلمش اما بنم بوندن خبرم يوقدي . خسرو افندی حضرتلری ، یانندن آيريلاجغمز صیره ، چیقاردی او كنجڭ یول پاره سنی كندیسنه ویردی . حالبوكه اوراده بویله بر لاف ایدیلمدی ، هیچ بر شی سويلنمدي . اما آچیق بر شكلده او ، كشف و كرامتیله اونڭ ناصل كلوب ناصل دونديگني جناب حقڭ اذنیله بیلدیگی ایچون اوڭا طوتوب یول پاره سنی ویردی . بزلره ویرمدی . یالڭز اوڭا ویردی . صوڭره أوگرندمكه چوجق بورچ آلمش كلمش . “ [٣]
سلیمان سميزڭ خاطره سی
یاقین طلبه لرندن اولان بوردور بوجاقلي مرحوم سلیمان سمیز ، بوردور حپسخانه سنده محبوس ایكن ، خسرو أفندینڭ بویوك بر كرامتیله قارشیلاشیر .
” بز ١٩٦٤ ‘ ده نورجيلقدن طولایی بوردور حبسخانه سينده يكن ، محكوملردن بری سوركلی اللّٰهه كفر ايدييوردى . بو طوروم بزه مدهش اضطراب ویرییوردی . بر كون ، ‘ ذاتاً بوراده حبس طورومده يز . بن بونڭ جزاسنی ويره يم ديه قفامه قویدم . آرتیق دواملی صورتده اونی دوشونویورم . ياتديغمز رانزه لرڭ آلتنده بویوك تخته لر وار . ‘ جزاسنی بونلرله ويره يم‘ دییه قرار ویردم. كیجه اولدیغنده بطّانيه يي باشمه چكدم . او آنده بطّانيه نڭ آلتنده دوشونوركن ، بردن چوجقلريمي یانمده كوردم . بطّانيه يي قالديرييورم ، كیمسه یوق . باشمه چكییورم ، یینه چوجقلرم ! ‘ ياهو دیدم ، ‘ بونده بر حكمت وار . چوجقلر بو ایشدن محزون قالاجقلر هر حالده . عجبا نه ياپسه مكه ؟ بوگونده صبر ايده يم باری دییه قلبمه كلدی . ایرته سی كونه تأخیر ایتدم . او كون ، اسپارطه دن حاجی احمد قرداش اركندن حپسخانه یه زيارتمه كلدی . استادمز خسرو افندی اونڭله عجله خبر كوندرمش : ‘ سليمانه سلاممي سویله . بعض انسانلر حیوان حكمنده در . اونلرڭ سوزلرینه اعتبار ایدیلمز … ‘ دیمش . بو سوزلری دوینجه ، طاغ كبی بویوك بر یوكون آلتندن قورتولمش كبی اولدم . ‘ یا ربّی ، شكر ! ‘ دیدم . بتون صيقينتيلرم بردن ازاله اولدی ، كیتدی . “ [٤]
جاوید سراج اوغلینڭ خاطره سی
مرحوم جاوید سراج اوغلي ، يوغوسلاويه ده ١٩٦٠ ‘ لي ییللرده آچیلان نور مدرسەلرینڭ خواجه سیدر و بدیع الزمان حضرتلرینڭ وفاتندن صوڭره خسرو افندی ایله كوروشوب طانیشمق ایچون اسپارطه یه كلیر . كندیسنی خسرو افندی ایله كوروشديرمسي ایچون رجاده بولوندیغی ، كویا نورجی اولارق بیلینن بر اصناف ، بعض آرت نیتلره صاحب اولدیغی ایچون أوچ كون بوینجه كندیسنی اويالار و دواملی خسرو افندی علیهنده ایلری كیری قونوشارق اونی قرارندن واز گچیرمگه چالیشیر . فقط قرارندن اصلا واز كچمه ین جاوید أفندی یی اڭ صوڭنده كوچك بر چوجقله خسرو أفندینڭ اوینه كرهًا كوندرمك زورونده قالیر . بوندن صوڭره سنی خاطره لرنده كندیسی شویله آڭلاتییور :
” مگركه أوچ كوندر بڭا صیقینتیلر ویره رك كيتممه م ایچون بنی اويالادقلري خسرو أفندینڭ أوی ، أوچ دقیقه لق مسافه ده يمش . باغچه قاپوسنه كلدك و قاپونڭ طوقماغنى اوردق . بر قرداش قاپویی آچدی و آولی یه كیردك . بر ده باقدم خسرو افندی حضرتلری ، اوینڭ آولی یه باقان قاپوسنڭ اوڭنه چیقمش بكله یور . بن داها سلام بیله ويرممشكن ؛ ‘ سن خوش كلدڭ جاوید قرداشم ، خوش كلدڭ جاوید قرداشم ! كچمش اولسون جاوید قرداشم ، كچمش اولسون ! صفا كلدڭ بویور كچ قرداشم . قورتولدڭ آرتیق ؛ هیچ متأثّر اولما قرداشم صيقينتيڭ بيتدي‘ دیدی .
اللّٰه اللّٰه ! بن او آنده صانكه سحرلندم ! ایچمدن ” نره دن بیلدی بنم آديمڭ جاوید اولدیغنی ؟ بن بو قاپودن ایچری یه ایلك دفعه كیرییورم ! بو ناصل اولور ؟ “ دییه شاشقینلق كچیردم . كیم آڭلاتدي عجبا دییورم ؟ أوچ كوندر ياشاديغم صیقینتیلری نردن بیلدی ؟ اما اوراده بنی طانییان كیمسه ده یوق . اللّٰه اللّٰه ! صوڭره ایچری یه كیردك . مبارك ، سديرينه اوتوردی . بن ده ألنی اوپوب كوستردیگی مناسب بر یره اوتوردم . خسرو افندی ایله ایلك طانيشمه مز ایشته بو شكلده اولدی . “
علی آق بولوطڭ خاطره سی
خسرو أفندینڭ أمریله اسپارطه نڭ شرقی قره آغاچ ايلچه سينده نور مدرسه سی آچان و بو سببله آرقداشلریله برلكده ١٩٦٥ ، ١٩٦٦ و ١٩٦٧ ‘ ده أوچ دفعه حبس یاتان و صوڭنجيسنده بش سنه حبس جزاسی آلان [٥] ١٩٢٤ طوغوملی علی آق بولوط” پك چوق كرامتلرینه شاهد اولدم “ دیدیگی خسرو افندی ایله علاقه لی بر خاطره سنی شویله آڭلاتییور :
” بنم قايين پدريمڭ عربجه كتابلري اوقویوب آڭلایابیله جك قدر بر علمی واردی . اوڭا رسالۀ نوري طانيتمق ایچون نه قدر اوغراشديسه م دە طرفدار اولمییور ، بڭا آچوب اسكی تفسیر كتابلرندن اوقویور ، اونلری مدح ايدييوردي . هم آچدیغمز مدرسه ده قالب اوقومق ایسته ین بر طوروننه دە مساعده ایتمه یوردی . حتّی بنی ده خدمتدن واز گچیرمگه چالیشییوردی . برگون كندیسنه ، ” بابا ، بنم سنی اقناع ایده بیله جك بر بيلگيم یوق . كل برابر خسرو افندی یه كیده لم . سنڭ علمڭ وار ، اگر بگنمزسه ڭ بن ده دونرم “ دیدم . تمام اولور دیینجه جمعه كونی برلكده اسپارطه یه زیارتنه كیتدك .
واردیغمزده ایچریسی صاریقلی ، نورلی بر جماعتله طولیدی و خسرو افندی اونلره صحبت ایدییوردی . داها صوڭره بڭا دوندی و خدمتلردن صوردی . بن آڭلاتدقدن صوڭره قايين پدريمي طانيشديردم . كندیسنه اونڭ حقّنده هیچ بر شی سویله مدیگم حالده ، باشلادی آڭلاتمغه : ” بز اسكی تفسيرلرڭ ، كتابلرڭ قیمتنه بر شی دیمییورز . فقط اونلر كتبخانه لرده طولو اولدیغی حالده انسانلر بوگون بو طورومده ! جناب حقّ بو عصرده رسالۀ نور اسمنده یڭی بر قرآن تفسيري احسان ایتدی . بز ده بوگونڭ دردلرینه دوا اولان بو یڭی قرآن نورينڭ نشرینه چالیشییورز “ دییه كوزلجه آڭلاتدي . باشقه بعض موضوعلر دە آڭلاتدقدن صوڭره بزه مساعده ایتدی و ” آ رابانز حاضر یوللرده اگلنمەيڭ “ دییه اكله دى . او زمانلر بزم قضایه كونده بر اوطوبوس قالقار ، قاچيردڭمي او كون اسپارطه ده قالمق زورونده قاليردڭ .
طیشاری چیقدیغمزده بن استادڭ سوزی محقّق چیقار ، كجيكيرسه ك آرابه يي قاچيريرز دوشونجه سیله عجله ایدییوردم . فقط قایین پدر بنی طوردیروب قونوشمه یه چالیشییور : ” طور اوغلم بر یاهو . سز يولڭزي بولمشسڭز . بن بر شی بیلیرم ظن ایدردم . بو جماعتی بیلییور میسڭ سن ناصل بر جماعت بو ؟ بونلر عصر سعادت جماعتنه بڭزه یور . سزڭ بو یولڭز طوغری . سن خدمتنه دوام ایت . طورونی دە ياريندن اعتبارًا سڭا تسلیم ایده جگم . اونڭ ايشله يه جگي ایشلری ده بن یاپارم “ دییوردی . او بنی طوردیرمق ایستییور ، بن ده یورومك ایسته یوردم . نه یسه بویله غاراژه كلدك . یاقین یا ذاتاً . بر ده باقدق استادمزڭ دیدیگی كبی آرابه حركت ایتمش ، معاون قاپوده ” قره آغاچ ! قره آغاچ ! “ دییه باغیرییور . قوشدق یتیشدك . بر ثانیه داها طورسه ق آرابه كيدييورمش .
استادمز قايين پدرله یاپدیغمز أوڭجه كی قونوشمه لرده صانكه يانمزده يمش كبی تام دە اونڭ احتیاجنه كوره قونوشمشدي . هم براز صوڭره آرابه مزڭ قالقاجغنی دە كورمش كبی خبر ویرمشدی . اونڭ اوتوردیغی یردن طیش عالمی كورورجه سنه خبر ویردیگی بویله چوق كرامتلرینی كوردم . كیتدكدن صوڭره چوجغی دە مدرسه یه آلدق و يتيشمه سنه وسیله اولدق الحمد للّٰه .
آ بلەسي خدیجه خانمڭ خاطره سی
خسرو افندی ، ١٩٥١ ييلندن عمرینڭ صوڭنه قدر ، آ بلەسي خدیجه خانمڭ آنقره یه طاشينمه لري سببیله بوشالان اونده قالمغه باشلامشدی . كوچكلگڭدن بری خسرو افندی ایچون ایكنجی بر آننه كبی اولان چوق سودیگی آ بلەسي یاز آيلرنده كلیر ، خسرو افندی یه مسافر اولور ، ییمك چاماشیر كبی خدمتلرنده یاردیم ایدردی . آ بلەسي أوڭ مصرفلرينه اورتاق اولمق ایسته دیگڭده ، ” بن ذاتاً سڭا أو ایچون كرا ویرمییورم “ دییه رك قبول ایتمز ، اڭ سودیگی آ بلەسنڭ پاره سنی دخی قاريشديرماياجق قدر رزق خصوصنده دقّتلی طاورانيردي . بویله برلكده قالدقلری بر صیره ده ، آبلە سنڭ قوللانمسی ایچون كندیسنه آیری بر ابریق ویرن خسرو افندی آ بلە سنه دییوركه :
” آ بلە سن شو ابريقي قوللان . بنم آبدست آلمق ایچون قوللانديغم بو ابريقي قوللانمه “ دییور . داها صوڭره ١٩٦٤ حپسی سببیله خسرو أفندینڭ أوده بولونمدیغی بر صیره ده ، خدیجه آ بلەسي ناصلسه بوش طورویور دییه رك قرداشنڭ ابريقنده كي صویی قوللانمق ایستییور . فقط نه قدر آشاغی اگسه ده ابریقده كی صو بر تورلی آقمييور . شاشقینلق ایچنده ابريقي یرینه قویان آ بلەسي : ” آ خسرو بڭا تنبیه ايتمشدڭ اما ابريقه ده می تنبیه ایتدڭ “ دییه رك آغلایور . داها صوڭره رؤیاسنده پیغمبریمزی ( ع ص م ) ‘گورن آ بلەسنه رسول اللّٰه افندیمز ( ع ص م ) :
” أوزولمه ! خسرو بنم وارثمدر ! “ بویورارق كندیسنی تسلّی ایدییور .
یینه آ بلەسي خدیجه خانم ، خسرو افندی حقّنده كوردیگی چوق مبارك دیگر بر رؤیایی شویله آڭلاتمشدر :
” رؤیامده باقدمكه رسول اكرم ( ع ص م ) حجازده وفات ایتمش و بعض انسانلر اطرافنده تجهیز و تكفین ایشلری ایله مشغول اولییورلردی . ایش براز اوزاینجه بنم جانم صیقیلدی ومساعدە ایدڭ ده پیغمبر افنديمزي ( ع ص م ) براز دە بز كوره ليم دیدم . بونڭ أوزرینه او كيشيلر بڭا ؛ ‘ رسول اكرمی ( ع ص م ) ‘ بز سنڭ اوینه كوتورويورز دیديلر . صوڭره پیغمبر افندیمز ( ع ص م ) ‘ یڭ مبارك نعشنى آلوب قرداشم خسروڭ قالمقده اولدیغی بڭا عائد أوده بولونان ديوارده كي كوممه دولابڭ ایچنه قویدیلر . “ [٦]
سعید نوری أفندینڭ خاطره سی
قله أوڭی ” مباركلر هيئتي “ اعضالرندن حافظ مصطفی نڭ اوغلی و بدیع الزمان حضرتلرینڭ صاغلغنده كندیسنه طلبه اولانلردن سعید نوری خواجه افندی ، عسكره كیتمه دن أوڭجه بدیع الزمان حضرتلريڭي اسپارطه ده كی اونده زیارت ایدر . او صیره ده حضرت استاد كندیسنه ، ” حافظ سعید ، ان شأ اللّٰه عسكر دونوشنده سنی خدمتمه آلاجغم “ دیر . فقط عسكردن دوندكدن صوڭره بدیع الزمان حضرتلری وفات ایدر . بونڭ أوزرینه بر سوره استانبولده قرائت تعليمي كورن و عربجه درسی آلان سعید افندی ، داها صوڭره اسپارطه یه دونر . بر سوره صوڭره قله أوڭينه چوجق اوقوتمغه كلن و اصلاً اقربالرندن اولان طاهری موتلونڭ ” خسرو افندی سنی چاغیرییور “ دییه خبر ویرمسی أوزرینه خسرو أفندینڭ زیارتنه كیدر . بوندن صوڭره سنی كندیسی شویله آڭلاتمقده در :
” قاپوسنی چالوب دە خسرو أفندینڭ اوطه سنه كیردیگم صیره ده ، بر آنده قارشومده غایت آچیق و سچیك بر شكلده بدیع الزمان حضرتلريڭي كوردم . حیاتنده كندیسنی آلتی دفعه زیارت ایتمش و صحبتلرنده بولونمش اولدیغم ایچون غایت امينمكه عین سیما و عین سس ایله بدیع الزمان حضرتلری صانكه حیاتده یمش كبی بنمله قونوشمه یه باشلادی . بن بو حالدن بویوك بر شاشقینلق و حیرت ایچریسنده قالدم . بر سوره أویله دوام ایتدی . داها صوڭره باقدمكه قارشومده كی ذات خسرو افندیدر . صوڭره الڭده كی سكّۀ تصديق غيبي مجموعه سيڭي تفأّل ایدر كبی آچارق بڭا اوزاتدی و ” اوقو “ دیدی . اوقومغه باشلاینجه باقدمكه تام دە بابام حافظ مصطفی نڭ حضرت استاده يازديغي مكتوب آچیلمش ! …
یینه ، خسرو افندی استادمز تداوی اولمق ایچون آنقره یه كیتدیگنده بر سوره صوڭره بن ده آرقه سندن كیتدم . فقط یالڭز باغچه لي أولرده كي يگننڭ اونده قالدیغنی بیلییورم و آدرس حقّنده باشقه بر معلوماتم دە يوقدي . آنقره یه دە ایكنجی كلیشم . باغچه لي أولره اولاشدقدن صوڭره صوقاقلرده راست گله طولاشمه يه باشلادم . آدرسی ناصل بولاجغم دییه دوشونوركن بر ده باقدم قارشومده كی آپارتمانڭ پنجره سنده خسرو افندی ! اوراده بنی بكله یورمش كبی طیشاری باقییور . “ [٧]
یاشار چليكڭ خاطره سی
خسرو أفندینڭ ١٩٦٣ ‘ ده اطرافنده طوپلانان اسپارطه لی طلبه لرندن و اوزون ییللر چارشوده كی دكانی خسرو أفندینڭ ارتباط مركزی اولارق چالیشان یاشار چلیك شویله آڭلاتییور :
” بز خسرو أفندینڭ كرامتلرینه سوركلی مخاطب ایدك . اونڭ كلن مسافرلرڭ قلبندن كچنلري بیلمسی و اوڭا كوره قونوشمه سی هر زمان شاهد اولدیغمز خارقه لرندن ایدی . هم یاقین ویا اوزاق كله جكدن باذن اللّٰه بزه خبر ویردیگی پك چوق شیلرڭ برر برر چیقدیغنه چوق كز شاهد اولمشزدر و حالا دە شاهد اولمقده یز . یالڭز نمونه اولارق بر دانه سنی آڭلاتایم .
استادمزي ١٩٧٤ ‘ ده ازمیرده خسته خانه ده زیارت ایتمشدم . داها أوڭجه حپسده كی زیارتمده اولدیغی كبی بو زیارتمده ده كندیسنه كوچك بر گل یاغی كوتورمشدم . قالقاركن ویرمك أوزره ألمی جیبمه آتديغمده ، نه چيقاراجغمي بیلمدیگی حالده ألمی طوتدی و ” أوڭجه كی كتیردیگڭ گل یاغی داها بیتمدی . احتیاج یوق . باق جیبمده “ دیدی و چیقاروب كوستردی . ظاهرًا ألمی نه دن جیبمه صوقديغڭي و نه یاپاجغمی بیلمدیگی حالده بڭا بو شكلده قونوشدی . ایشته استادمزڭ بو حالی ، بلكه یوزلرجه كز قارشيلاشديغمز دواملی بر خاليدي . “ [٨]
قادر مصر اوغلینڭ خاطره سی
ایلریده كله جك اسكیشهر حپسی بحثنده ده كوروله جگی أوزره ، تاریخجی - یازار قادر مصر اوغلي بر مدّت اسكیشهرده برلكده حبس ياتديغي خسرو افندی أوزرنده شاهد اولدیغی كرامتلری ، خاطره لرنده قلمه آلمشدر . اونلردن بریسنی كندیسی شویله نقل ایدییور :
” خسرو أفندینڭ بنم حیاتمده ظاهر اولان كرامتی پك چوقدر . بر دفعه سنده ( محكمه ده ) جلسه يه چیقمادن بر ایكی كون أوّل بر رؤیا كوردم . او زمان رؤیا تعبيرندن پك آڭلامييوردم . كندیسنه تعبیر ایتدیردم … بو رؤیایی آڭلاتديغم خسرو آلتین باشاق : ” سن بو حپسدن چیقاجقسڭ . آنجق ایكنجی دفعه حبس اولاجقسڭ ! بو حبس ده برنجینڭ ایكی أوچ قاتی اولاجق ! “ دیدی . بو تعبیر عینًا چیقمشدر .
حتّی بر باشقه رؤیانڭ تعبیری طولاییسیله دە بڭا ، ایكی جلسه يه چیقدقدن صوڭره تخلیه اولاجغمی سویله مشدر . برنجی جلسه ایكی كون سورمشدي . ایكنجی كون طوروشمه يه كیرركن تخلیه اولوب اولماياجغمي صورمام أوزرینه :
” بو ایكیسی بر جلسه در . اون بش كون صوڭره بر جلسه داها یاپارلر ، اونڭ ایكنجی كوننده تخلیه اولورسڭ “ دیمشدر . بو دە عینًا چیقمشدر . حاكملر ایكنجی جلسه ایچون تام دە اون بش كون صوڭره یه كون ویرمشلر و بو ایكنجی جلسه نڭ ایكنجی كوننده تخلیه اولونمشدم . “ [٩]
سلاح الدین بڭلينڭ خاطره سی
صفّ اول نور طلبه لريندن نوری بڭلينڭ اوغلی مرحوم سلاح الدین بڭلی ، خسرو أفندینڭ طلبه لرینه كندی باشندن كچن شو حادثه یی آڭلاتمشدر :
” بن كنچ ياشلرده يكن خسرو أفندینڭ پازار آلیش ويريشنى یاپمق كبی بعض خدمتلرینی كوروردم . سوركلی اولارق ، أوڭجه دن طانيشديغمز چارشوده كی فلان آدمڭ دكّاننه اوغرامه دییه تنبیه ایدردی . ( او آدم دە خسرو أفندینڭ اڭ باش معارضلرندن بريدي . ) بن ده آرا صیره او دكّانه اوغراديغم حالده ، كيتمييورم دیردم . بر كون یینه خسرو أفندینڭ آلیش ویریش یاپدیغم قپاقلی سپتيله پازاردن دونركن او آدمڭ دكّاننه اوغرامشدم . او دە بر ایشی كورمم ایچون بر یره قدر كیدوب كلمه مي ایسته دی . بن یوقكن او آدم سپتڭ قپاغنی آچمش و ایچنده كی پاطليجانلرڭ قفالرینی قوپاروب كیری ایچنه قویمش . ( بو شكلده خسرو افندی یه كوز طاغی و تهدید مساژلري كوندردكلرینی دوشونويورلردي . )
بن ده خبرسز بر شكلده سپتی كوتوروب خسرو افندی یه تسلیم ایتدم . سپتده كي وضعیتی كورن خسرو افندی ایرته سی كون یاننه كيتديگمده بڭا طوغریدن ، ” او آدمڭ یاننه كيتدڭمي “ دییه صوردی . بن ده قورقودن كیتمدم دیدم . بونڭ أوزرینه خسرو افندی اوراده آچیقده بولونان ٢٢٠ وولتلق الكتریگ تلّه ريني طوتارق ، ‘ باق سلاح الدین یالان سويله مه يني الكتریگ چارپماز . اگر طوغری سويلويورسه ڭ طوت‘ دیدی . بن ده آغلايارق اوت افندیم كيتدم ديه اعتراف ایتدم . “ [١٠]